Mañá mércores 5 de maio de 2010 ás 20.00 h terá lugar, no salón de actos do Sexto Edificio do Museo de Pontevedra, o acto de presentación do libro "Os instrumentos musicais na tradición galega" de Pablo Carpintero Arias con deseños de Xoán Ramón Marín Martínez editado por Difusora de Letras Artes e Ideas no marco das iniciativas desenvolvidas polo proxecto Ronsel. Esta obra vén de recibir o premio Antón Losada Diéguez na modalidade de investigación e ensaio.
Ademais, poderemos gozar cun breve concerto didáctico do autor, Pablo Carpintero quen dedicará arredor de 30 minutos a explicar a orixe e a evolución da gaita de fol en Galicia. Poderemos escoitar algunhas gaitas sen fol como os clarinetes sinxelos e duplos, empregados polos nenos no camiño de aprendizaxe cara á gaita de fol, uns instrumentos moi semellantes aos empregados no antigo exipto. Tamén poderemos escoitar o son dos óboes duplos similares ás tibias romanas e aulòs gregos. Dentro xa das gaitas de fol, Carpintero fará soar instrumentos de lingüeta sinxela como as gaitas de cana e sabugueiro ou a rosca do Baixo Miño. En canto ás gaitas de fol propiamente ditas, escoitaremos varios instrumentos antigos, de morfoloxías diferentes en canto ao número de bordóns, procedentes de varias zonas de Galicia e tamén poderemos escoitar a reprodución, feita polo autor, dunha das gaitas de Perfecto Feijoo conservadas no Museo de Pontevedra.
O día 15 de Abril tivo lugar en Lugo a presentación de BAILABÉN, un método de aprendizaxe do baile tradicional galego realizado por Edith Cotilla Quintela e Gustavo Couto Rodríguez.
O ácto tivo lugar no Salón de Áctos do Centro Lug II (Rúa Pintor Corredoira nº 4- Lugo) ás 20.00 horas.
No acto participaron os autores Edith Cotilla e Gustavo Couto, acompañados de Cándido Meixide en representación da Editorial Cumio.
Coa presentación da publicación ‘Bailabén’, libro que ven acompañado dun DVD, a aprendizaxe do baile galego deu un paso máis xa que nesta publicación se marcan as pautas a seguir na aprendizaxe da xota e da muiñeira.
Pablo Carpintero presentará a súa monografía "Os instrumentos musicais na tradición galega" en Pontevedra. Nun principio, a presentación estaba prevista para hoxe mércores 14 de Abril mais foi adiada e finalmente terá lugar ao mércores 5 de Maio ás 20:00 horas.
A obra conta cos deseños de Xoán Ramón Marín Martínez, e foi editada en Difusora de Letras Artes e Ideas coa oportuna revisión lingüística de Xosé Henrique Costas.
Esta obra, que conta co aval da UNESCO, describe e relata a historia coñecida de 144 instrumentos musicais e útiles sonoros que se empregaron en Galicia. A magnitude do traballo vai alén das case 500 páxinas e 1000 fotografías pois desde unha perspectiva científica e rigorosa achega a clasificación dos 144 instrumentos musicais catalogados dentro do sistema científico máis empregado en occidente, a clasificación de Hornbostel e Sach.
PRESENTACIÓN DO LIBRO BAILABÉN EN LUGO
O vindeiro Xoves día 15 de Abril, terá lugar en Lugo a presentación de BAILABÉN, un método de aprendizaxe do baile tradicional galego realizado por Edith Cotilla Quintela e Gustavo Couto Rodríguez.
O ácto terá lugar no Salón de Áctos do Centro Lug II (Rúa Pintor Corredoira nº 4- Lugo) ás 20.00 horas.
No acto participarán os autores Edith Cotilla e Gustavo Couto, acompañados de Cándido Meixide en representación da Editorial Cumio.
Edith Cotilla e Gustavo Couto ensinan a muiñeira por DVD
A obra ‘Bailabén’ é a primeira que marca pautas para a aprendizaxe de pezas galegas
A aprendizaxe do baile galego deu un paso máis coa presentación da publicación ‘Bailabén’, un libro acompañado dun DVD, que marca as pautas a seguir na aprendizaxe da xota e da muiñeira. ‘A idea xurdíu no primeiro congreso de ensinantes de música tradicional, onde mestres de Primaria e Secundaria nos trasladaron a falla dun manual polo que impartir clases de baile’. Así lembrou Gustavo Couto a orixe da obra de Edicións do Cumio que onte se presentou na Casa Galega da Cultura.
Couto, de 26 anos, leva 15 no mundo do baile galego. Dirixe o grupo compostelán Ultreia e imparte clases en varias escolas. Edith Cotilla, coautora de ‘Bailabén’, leva no mundo da música tradicional dende os cinco anos. Agora con 30, compaxina o seu labor de bailarina co de docente. Ambos son os responsables do primeiro método do ensino do baile popular galego: ‘Ata agora tódolos sistemas que se utilizaban na aprendizaxe estaban baseados na improvisación porque non había nada sobre o que traballar; con este libro propoñemos un xeito sinxelo de achegamento a dous bailes para un nivel de básico a medio’.
O apartado máis práctico da publicación, o DVD, recolle cinco puntos a desenvolver: estiramentos para antes e despois, exercicios de equilibrio e de ritmo, pasos de diferentes movementos e finalmente, coreografías realizadas a partires dos punteos propostos. ‘O primeiro que hai que dominar é o equilibrio e o ritmo para poder facer os pasos sobre unha perna’.
Couto considera que o mellor momento para iniciarse no baile son os cinco ou seis anos,’aínda que se hai gañas e motivación pódese comezar a calquera idade’. Con ‘Bailabén’, márcanse as pautas de baile tanto para homes como para mulleres que comparten método de ensino, aínda que despois segan sendo eles os que marquen o punto. Con esta publicación, os autores non pretenden establecer criterios de aprendizaxe, senon amosar un método baseado nun baile meramente popular.
‘Nos últimos anos aumentou a demanda entre a xente que se apunta para aprender sen intención de subirse a un esceario, senon para pasalo ben nas festas’. Para Couto, o baile popular recuperou o seu posto na sociedade a través dos seráns e encontros cada vez máis cotiás nas grandes cidades como Vigo. Aínda que recoñece que estes bailes resistiron grazas aos que os subiron os escearios.
www.atlantico.net
Bailabén' é o título da guía de aprendizaxe do baile tradicional que vén de sacar do prelo Edicións do Cumio. A obra pretende achegar material didáctico aos profesores de Primaria e Secundaria e afeccionados e ensinantes do baile tradicional. Os ensinantes Edith Cotilla e Gustavo Couto firman a publicación que se vende acompañada dun DVD.
A obra, acompañada dun DVD, conta con explicacións detalladas, secuencias de fotografías nas que ver os movementos con detalle e un vídeo de máis dunha hora de duración no que se poden atopra todos os pasos e bailes básicos do baile tradicional galego. O prezo do volume co DVD é de 25 euros.
www.anosaterra.org
www.cumio.com
O salón de actos da Deputación Provincial de Lugo acolleu onte a presentación do libro de Pablo Carpintero “Os instrumentos musicais na tradición galega”, quen ofreceu un concerto didáctico logo da súa presentación. No acto de presentación do libro interviron, ademais: en representación das tres universidades galegas, Iván Area, Vicerreitor de Relacións Institucionais da Universidade de Vigo e director do proxecto Ronsel; Francisco López Rodríguez, director xeral de Promoción e Difusión da Cultura da Xunta de Galiza; Ramón Marín, autor dos deseños do libro; e Xavier Paz, responsable da Editorial Difusora de Letras Artes e Ideas.
A través de 500 páxinas, 1000 fotografías e múltiples ilustracións, a obra dá cabida a máis de 140 instrumentos musicais e recolle o traballo levado a cabo por Carpintero nos últimos 15 anos. A principal conclusión tras tantos anos de traballo: darse conta de que “en Galicia contamos cunha riqueza inmensa, algo que acontece en moi poucos países, e é que temos a virtude de que conservamos cadeas evolutivas completas na maior parte dos instrumentos musicais”.
Nos vindeiros días o autor realizará concertos didácticos para presentar o seu libro en diferentes puntos da xeografía galega:
- sábado 20 de febreiro de 2010 no programa Lume na Palleira na sintonía da Radio Galega 2 de 16 a 17 h.
- sábado 20 de febreiro de 2010 ás 12.30 h. na Biblioteca Castrillón da Coruña, coa participación de Susana Seivane.
- xoves 25 de febreiro de 2010 ás 20.00 h no museo municipal de Ourense
O Conservatorio Profesional de Música de Vigo acolleu onte a presentación do libro de Pablo Carpintero "Os instrumentos musicais na tradición galega" , un gran traballo de recuperación da historia musical de Galicia que estase a presentar por toda a comunidade.
Este logro forma parte do Proxecto Ronsel que xurde da colaboración entre a Consellería de Cultura e Deporte, Innovación e Industria, a Axencia Galega de Desenvolvemento Rural da Xunta (AGADER) e as Universidades galegas. As guías fundamentais son a realización do inventario e a salvagarda e a posta en valor do Patrimonio Cultural Inmaterial de Galicia.
Iván Area, vicerreitor de Relacións Institucionais da Universidade de Vigo e director deste proxecto, explica que a catalogación dos instrumentos fora algo pendente e a materialización do traballo veuse acompañada pola boa resposta que acada nas librerías, nas que a primeira edición do libro está a piques de esgotarse.
No acto interviu tamén o internacional gaiteiro vigués Carlos Núñez, que dende novo traballou perto de Antón Corral, un dos maestros na construción de instrumentos tradicionais.
A presentación incluiu un breve pero intenso concerto didáctico de Pablo Carpintero.
Desde o proxecto Ronsel veñen de publicar un libro de interese para todas as persoas vinculadas ao mundo da música tradicional, a monografía "Os instrumentos musicais na tradición galega" de Pablo Carpintero Arias, con deseños de Xoan Ramón Marín Martínez, editada en Difusora de Letras Artes e Ideas coa oportuna revisión lingüística de Xosé Henrique Costas.
Esta obra, que conta co aval da UNESCO, describe e relata a historia coñecida de 144 instrumentos musicais e útiles sonoros que se empregaron en Galicia. A magnitude do traballo vai alén das case 500 páxinas e 1000 fotografías pois desde unha perspectiva científica e rigorosa achega a clasificación dos 144 instrumentos musicais catalogados dentro do sistema científico máis empregado en occidente, a clasificación de Hornbostel e Sach.
Na actualidade estanse a facer presentacións por todo o país, que comezan este xoves día 11 de febreiro de 2010 ás 18.00 h no auditorio David Russell do Conservatorio Profesional de Música de Vigo. Trátase de actos nos que se mesturan as intervencións por parte dos autores, coordinador do proxecto e editores, cun breve pero intenso concerto didáctico de Pablo Carpintero que permite comezar a saborear os contidos do libro.
Outros actos que xa están programados son:
- xoves 18 de febreiro de 2010 ás 20.00 h no salón de actos da Excelentísima Deputación Provincial de Lugo
- sábado 20 de febreiro de 2010 no programa Lume na Palleira na sintonía da Radio Galega 2 de 16 a 17 h
- sábado 20 de febreiro de 2010 na cidade da Coruña, lugar e hora por determinar
- xoves 25 de febreiro de 2010 ás 20.00 h no museo municipal de Ourense
Este Sábado día 23 de xaneiro, ás 19 horas, no Salón Rexio do Círculo das Artes de Lugo (Praza Maior, 23) terá lugar a presentacion do libro "Así fan os bailadores".
O acto será presentado polos autores, tamén participarán bailadores e bailadoras de Cántigas e Frores.
"Así fan os bailadores..." contén unha compilación de danzas e bailes tradicionais, presentados como unha iniciación ao baile galego. O libro
consta de transcricións musicais en partitura, diagramas espaciais e
cinetogramas, fotografías, ilustracións e explicacións. No DVD pódense ver ditas danzas e bailes, realizados por grupos de nenos e mozos con música ao vivo. Inclúese un CD coa música gravada en estudio, que posúe a calidade requirida para servir de apoio á execución dos bailes, ou ben á escoita por pracer.
O interese da obra vai moito máis aló da mera práctica, visualización e escoita da música nela contida, ao incluír a reprodución en cinetografía das danzas e bailes practicados. Un método de escrita aplicado á danza, ideado por Rudolf Laban a comezos do século XX e coordinado nesta obra por János Fügedi, profesor na Academia Húngara de Danza e investigador do Instituto de Musicoloxía da Academia Húngara das Ciencias de Budapest.
Este traballo está dirixido a profesores de Educación primaria e secundaria, así como doutros niveis educativos, animadores culturais e monitores de tempo de lecer, e mestres de baile tradicional; tampouco esquecimos ás familias que queiran iniciar ás nenas e nenos nos nosos bailes e danzas, que conforman parte destacada do noso patrimonio cultural inmaterial.
A Asociación de Gaiteiros Galegos considera inaceptable que unha institución pública ignore o noso idioma nunha publicación sobre A Gaita.
Moi recentemente vense de editar unha obra de Fritz Schneider sobre a gaita de fol en Europa. A obra contén máis de 150 fotografías de iconografías sobre este instrumento que representan as culturas tradicionais de practicamente todos os países europeos. Cada iconografía acompáñase dun texto, todos xuntos van construíndo unha pequena historia da gaita de fol en Europa. A obra está editada pola Escola Provincial de Gaitas da Deputación de Ourense, coa participación directa do seu director Xosé Luís Foxo segundo consta nos agradecementos. A obra foi editada en catro idiomas: alemán, francés, inglés e español.
Para a Asociación de Gaiteiros Galegos é inadmisible que unha publicación editada con cartos de todos os galegos a través dunha institución pública sexa escrita en catro idiomas agás o galego. Cando se le o título resulta sorprendente atoparse co seguinte texto: Die sackpfeife/La cornemuse/The bagpipe/La gaita, trátase dunha publicación tretralingüe, feita desde un organismo público galego, na que o noso idioma non é un dos empregados. Segundo a Asociación de Gaiteiros Galegos “A aldraxe para a nosa cultura chega por veces a extremos desconcertantes dende determinados estamentos que atacan a liberdade cultural”. Dende a AGG afirman que “parece claro que existe, desde as institucións gobernadas polo Partido Popular, unha presión para eliminar da rúa o noso idioma, este libro non é máis que unha clara e perfecta mostra da nova política lingüística do goberno e do que o novo decreto do galego tentará co noso idioma: eliminalo”.
Segundo directivos da Asociación de Gaiteiros Galegos “esta publicación non é máis que unha continuación do ataque á nosa cultura iniciado polos responsables da Deputación de Ourense coa creación da Escola de Gaitas e a Real Banda de Gaitas”, Para os membros da AGG as formacións de bandas de gaitas impulsadas dende o ente provincial ourensán levan consigo unha desnaturalización intencionada da figura do gaiteiro como parte da nosa identidade cultural e do noso feito diferencial como país.
O Gaiteiro e mestre de gaita da Tradescola Bruno Villamor, vén de presentar os dous primeiros cadernos do seu método progresivo para gaita galega. A través da editorial Dos Acordes, constitúe un completo método en dez volumes correspondentes aos graos elemental e profesional de gaita, que é valido tamén para o seu uso en asociacións, academias, cursos ou ben como complemento á formación de calquera gaiteiro.
Estas publicacións xa están á venda nas librarías por un prezo de 12 euros a unidade, mais ten un prezo especial de lanzamento de 10 euros mercándoo a través da páxina www.dosacordes.com. Tamén se ofertan prezos especiais para mestres a través da web.
Máis información na páxina www.dosacordes.com
O domingo 19 de Xullo, ás 20:00 horas do serán, no transcurso do XIV Certame de Bandas de Música no auditorio municipal Cine Alovi de As Pontes, será presentado o libro GAIFONÍA.
Trátase de dúas obras musicais para gaita galega e banda: suite PARA OS DA NOSA TERRA e marcha procesional Á NOSA SEÑORA VIRXE DO CARME, ámbalas compostas polo Mestre Gaiteiro Xoán Carlos Rilo e harmonizadas e orquestradas para Banda polo director Joan Bautista Bernat.
GAIFONÍA foi editado pola Excma. Deputación de A Coruña en colaboración co Concello de As Pontes.
Con esta publicación, os autores pretenden principalmente dous obxectivos:
1.- Facilitar a calquera alumno que estude nos Conservatorios de Galicia o acceso a este tipo de obras que lle permitirá familiarizarse coa nosa música.
2.- Paliar o déficit que seguimos tendo de obras para gaita e banda, co firme propósito de que o noso instrumento mais representativo adquira e manteña o lugar que lle corresponde.
Edicións do Cumio presenta un novo volume da colección multimedia. Nesa ocasión trátase da obra dedidaca ao gaiteiro Agustín Lorenzo Loroño, fundador do grupo Brisas do Río Ulla. Agustín foi, ademais, impulsor de formacións históricas como Os Rosales, Os Areeiras, Faíscas de Xiabre e Milladoiro.
A obra, froito da investigación e rigoroso traballo de Xosé Ameneiro Piña, elabora unha exhaustiva historia do grupo e recolle fotografías e partituras, así como unha guía de audición. A edición complétase con material en video recollido nun DVD. Tamén se poderá atopar nas tendas en poucas semanas un disco con gravación do grupo Brisas do Río Ulla, que formará parte da colección musical 'Os Nosos Gaiteiros'.
Pode descargar gratuitamente un avance desta obra aquí.
Xa se pode atopar nas tendas, distribuído por A Lonxa Cultural, o novo traballo audiovisual da Asociación de Gaiteiros Galegos Trece Lúas. Como en anteriores publicacións, os socios e socias da AGG poden mercar o seu exemplar cun prezo reducido de 10 € + gastos de envio, solicitándoo a través do correo electrónico: secretaria@gaiteirosgalegos.com ou ben chamando ó número de teléfono 986 847 074. Tamén existe a opción de mercalo directamente na oficina da AGG situada na rúa Alfonso XIII, nº7 en Pontevedra, ou na Tradescola: Pintor Corredoira, 4 en Lugo.
Trece Lúas é un libro-CD-DVD que nos convida a facer unha viaxe no tempo, unha viaxe de doce meses con cadansúa canción e co ciclo do ano como fondo da escena. É unha proposta de lecer, para gustar da nosa música, aquela que sempre estivo aí e que neste disco presentamos dun xeito actualizado. Pero esta proposta vai moito máis alá. Como continuación da liña seguida en traballos editados anteriormente (“O Quiquiriquí” e “Pelo Gato 24”), trátase dun material didáctico que pretendemos axude en boa medida á difusión da nosa cultura. Unha ferramenta pensada para facer chegar, sobre todo aos máis novos, un anaco do que somos e do que queremos seguir sendo.
Desde a Asociación de Gaiteiros Galegos temos a convicción de que o futuro das nosas tradicións, o garante da súa supervivencia, está na xuventude. Debemos achar a maneira de que a liña de transmisión cultural se adapte aos tempos para seguir sendo efectiva. Así elaboramos Trece Lúas, dun xeito respectuoso coas nosas tradicións e ao mesmo tempo atractivo, aplicando as novas tecnoloxías das que dispoñemos. Agardamos que poida ser utilizado como elemento educativo en calquera dos ámbitos, xa sexa escolar ou familiar, e supoña un paso máis de cara á normalización da nosa música tradicional.
Este novo traballo, editado pola Asociación de Gaiteiros Galegos, conta có patrocinio da Consellería de Cultura da Xunta de Galicia a través da Dirección Xeral de Creación e Difusión Cultural, e da Universidade de Vigo.
