Aínda estades a tempo para anotarvos no XV Xantar Gaiteiro, amplíase o prazo ata o Venres 9 de Abril.
Un ano máis, a Asociación de Gaiteiros Galegos quere convidarvos ao XV Xantar Gaiteiro. Será o vindeiro Domingo 11 de Abril, ás 14:30 horas, no restaurante Agarimo de Lalín.
Esta xuntanza non ten outra finalidade que a de pasar un día agradable en compaña dos que gustamos da música tradicional. Quen así o queira poderá traer o seu instrumento para compartir a súa música co resto de convidad@s despois do xantar.
Para asistir ao XV Xantar Gaiteiro, deberás poñerte en contacto connosco antes do 9 de Abril, indicando, se é o caso, o número de persoas que te acompañarán. Máis abaixo tes diversos xeitos para facelo.
• DATA: 11de Abril de 2009. 14:30 horas (prégase puntualidade).
• LUGAR: Restaurante Agarimo – 986 78 09 02. Avda de Montserrat 2, 36500 Lalín. Pontevedra
• MENÚ: Cocido Completo. Queixo con marmelo, leite fritido e filloas. Auga, mencía, augardente e queimada.
• PREZO: O prezo é de 25 euros por persoa que serán entregados ao entrar.
• RESERVA: secretaria@gaiteirosgalegos.com . Teléfono/Fax: 986 847 074
Agardamos a túa participación
A Asociación de Gaiteiros Galegos considera que os rapaces son o xerme da nosa música polo que se achega ós colexios mediante unhas charlas a cargo de Felipe de Rea, nas que se explica a importancia que tiveron estas formacións na música tradicional galega e nas que se fai unha mención especial ó percorrido musical do Mestre Landín Pazos.
Máis de 200 escolares do Concello de Marín tiveron oportunidade de coñecer a música tradicional da súa comarca coas presentacións didácticas levadas a cabo co gallo da VI Mostra de Cuartetos Tradicionais de Marín.
Os alumnos do terceiro ciclo de primaria divírtense ó son da gaita que esperta o interese das novas xeracións e ameniza a actividade que da pé a visitar a exposición que estará no Museo Manuel Torres ata o 30 de Xaneiro.
A Asociación Cultural "Cantigas e Frores" de Lugo organiza para o vindeiro sábado o acto “Gustavo Freire na memoria”.
Durante o transcurso do acto realizarase a presentación dos libros "Asi fan os Bailadores”, "Gustavo Freire na Galicia da época Nós" e "Non Chores Sabeliña".
Éste acto contará a maiores coas actuacións da Banda de Gaitas da Asociación Cultural "Cántigas e Frores" e do Cuarteto de Acordeóns "Tasabala”.
O acto terá lugar no Salón Rexio do Círculo das Artes de Lugo o día 23 de Xaneiro ás 19.00 Horas.
A organización corre a cargo da Asociación Cultural "Cántigas e Frores", e conta coas colaboracións da Vicepresidencia Primeira da Deputación de Lugo, a Editorial Dos Acordes e o Círculo das Artes de Lugo.
Celebrarase os días 11 e 12 de Decembro no Edificio de Ferro da Universidade de Ourense e no Auditorio desta mesma cidade respectivamente.
Nesta ocasión estará Dorothé Schubarth que, xunto con Antón Santamarina, impartirán unha conferencia o dia 11 de decembro e o Sábado 12 recibirán unha homenaxe xunto ó gaiteiro Faustino Luís Seoane, gaiteiro do Canizo - A Gudiña.
Este mesmo día actuarán Xabier Blanco e as pandereteiras Os Muiños de Oliveira.
O rematar, as 22:30 hai Cea - festa, no local de Aixiña (xunto o Paco Paz)
Prezo: 20€ (15€ para alumnos da AOFT):
Reservas: Gonzalo 654 173 524,
Fernando 658 370 849 ou no correo gabelairas@yahoo.es
Máis información: http://aoftou.spaces.live.com/
A Fundación Caixa Galicia dentro do ciclo "20 anos de cultura" propón o debate aberto "20 Anos de Música Galega".
Terá lugar o 12 de Decembro ás 12h no Centro Social de Caixa Galicia en Lugo.
Contará con Xurxo Souto como moderador e coas intervencións de Mercedes Peón, Fernando Luaces, Suso Atanes e Alberto Comesaña.
O vindeiro sábado 14 de Novembro, terá lugar o VIII Encontro de Pandeireta Galega e Asturiana, na Sala Retrouso da praia de Samil (Vigo). Ofrecerase cea a base de cocido e os concertos de dous grupos de pandereteiras galegas e un asturiano.
O prezo é de 23 €. Pódese facer a reserva no seguinte enderezo de correo electrónico: xuntanza_transeu@hotmail.com.
A Vicepresidencia do Goberno de Cantabria, a través da Dirección Xeral de Asuntos Europeos e Cooperación ao Desenvolvemento, en colaboración coa Asociación de Toque Pechado, puxo en marcha o espectáculo "JUELLES: Encontro de Gaitas Europeas", un escaparate para as distintas gaitas europeas no que interveñen algunhas das principais e máis virtuosas figuras internacionais como Diarmaid Moynihan (Irlanda), Patrick Molard (Bretaña), Ventzislav Andonov (Bulgaria), Hana Klímová (República Checa), Oscar Ibáñez (Galicia), Roberto Diego (Cantabria), Jorge Areces (Asturias), ou Simó Busquets (Cataluña).
Ao mesmo tempo "JUELLES: Encontro de Gaitas Europeas" pretende ser un espazo para a convivencia, un punto de encontro e de intercambio cultural referencial, para todos os gaiteiros e todas aquelas persoas sensibles á música tradicional, que percorrerá diferentes municipios da rexión cántabra como Santoña, Torrelavega, Reocín, Reinosa, Colindres, Cabezón de la Sal e Val de San Vicente, durante os días 29, 30 e 31 de outubro, pondo en relevo os valores do Ano Europeo da Creatividade e a Innovación.
Antes do espectáculo as distintas localidades serán amenizadas cun pasarúas a cargo de bandas de gaitas como "Cantabria", "La Montaña", "Vicaruela", "Traslarroza", "Gaiterus Tresmeranus", "Villa de Colindres" ou "Los Gaiteros de Pechón".
Como actividade paralela os gaiteiros que o desexen terán a oportunidade de asistir a unha master class de uilleann pipes con Diarmaid Moynihan ou de highland bagpipe con Patrick Molard, que se celebrará o sábado 31 de outubro en Reocín. A inscrición na master class será gratuíta e realizarase, ata o venres 30 de outubro, enviando un e-mail a cantabriaeuropa@gobcantabria.es, no que se indique o nome, apelidos, DNI, dirección, teléfono e e-mail do interesado, e a master class elixida.
Para darlle a maior difusión posible o espectáculo "JUELLES: Encontro de Gaitas Europeas" será emitido por AQUÍ TV para toda a comunidade cántabra e o audio será gravado en directo para a edición dun CD.
A plataforma cidadá Queremos Galego, conformada por persoas a título individual e entidades de diferentes ámbitos, entre as que se atopa a Asociación de Gaiteiros Galegos, convoca unha gran manifestación en favor da lingua. Será o vindeiro 18 de outubro en Santiago de Compostela e partirá ás 12 da mañá da Alameda.
Corren tempos difíciles para a nosa lingua e a nosa cultura, tempos en que debemos dar unha resposta firme en defensa dos nosos sinais de identidade. Dende a Asociación de Gaiteiros Galegos queremos animarvos á participación na manifestación do vindeiro domingo á que asistira unha ampla representación da xunta directiva da AGG, levando consigo os seus instrumentos para acompañar o percorrido con música tradicional. Convidamos aos socios e socias, grupos, asociacións e demais colectivos e xente relacionada coa música tradicional a facer soar os seus instrumentos na defensa da nosa lingua e da nosa cultura.
Máis información adhesións en www.queremosgalego.org
O vindeiro xoves, 1 de Xuño ás 22:00 horas, no Teatro Sá de Concertos do Centro Cultural Caixanova terá lugar a homenaxe Sondeseu, 10 anos do CMT. A reserva de localidades pódese realizar en www.caixanova.es ou na taquilla telefónica 902 504 500.
A creación do Conservatorio de Música Tradicional, dentro da Escola Municipal de Artes e Oficios de Vigo (antes Universidade Popular) en 1996 veu inaugurar un novo xeito de concebir os centros educativos no amplo mundo do ensino da música popular galega.
Cumprénse 10 anos da súa aparición e polas súas aulas teñen pasado a maior parte dos músicos que na actualidade manteñen vivo e creador o mundo da música tradicional e a súa expresión urbana: o folc.
Un dos máis importantes fitos no decorrer destes anos ten sido a formación da primeira Orquestra Folc en España: Sondeseu. Co seu primeiro traballo discográfico no mercado (Mar de Vigo, que merecéu mencións especiais da prestixiosa revista Folk Roots e dos medios galegos españois especializados) e o segundo en proceso de produción, Sondeseu xa é un referente nacional e internacional.
Mais información.
109 entidades e institucións de diverso tipo, entre as que se atopa a AGG, enviaron xa o seu apoio á manifestación convocada pola Mesa pola Normalización Lingüística para o próximo 17 de maio, que sairá ás 12 do mediodía da Alameda de Santiago. Esta mobilización cidadá pretende conseguir un “salto adiante” para a lingua galega, aproveitando a oportunidade histórica da elaboración dun novo Estatuto, para que sexa “o Estatuto da normalidade para o galego” e “un Estatuto con tolerancia cero ás discriminacións lingüísticas”.
Animamos a todos os nosos socios a acudir á manifestación posto que consideramos que, ao igual que a música, a fala, ou calquera outra manifestación da cultura galega deben acadar unha completa normalización e integración na sociedade da Galiza actual. É importante deixarnos sentir para lograr esa meta.
Podedes consultar o manifesto “Porque temos, porque queremos, porque debemos. O Estatuto da normalidade lingüística. O galego: un dereito, un deber.” No seguinte enderezo http://www.amesanl.org/17maio.htm
Para todos aqueles que aínda non teñades plan para a ponte do 1 de maio a asociación ‘Xuntanza de Galegos’ de Alcobendas invítavos a participar nunha concentración de músicos tradicionais en contra das falsificacións da tradición musical galega e a favor dunha interpretación responsable da mesma.
A devandita concentración terá lugar a fin de semana do 29 e 30 de abril na vila madrileña. Os actos comezarán o día 29 de abril cun pasacorredoiras polas rúas de Alcobendas, para rematar cunha xuntanza no feiral, onde cada grupo realizará unha actuación de entre 15 e 20 minutos. Os recorridos e a festa non cesarán ata luns día 1 que é festivo.
Mais información.
O vindeiro domingo 23 de abril terá lugar a Asemblea Xeral Ordinaria do 2006. Este ano terá lugar a partir das 9:30 na Sala Mozart do AUDITORIO DE GALIZA, sito na Avenida do Burgo das Nacións s/n, na cidade de Santiago de Compostela.
A asemblea terá a seguinte orde do día:
1. Lectura e aprobación se proceder das actas anteriores (24 de abril de 2005).
2. Informe das actividades realizadas.
3. Aprobación do estado de contas do ano 2005.
4. Rogos e preguntas.
O pasado domingo 26 de marzo tivo lugar o convite que a Asociación de Gaiteiros Galegos organiza cada ano ao comezo da primavera. O lugar escollido este ano foi o restaurante Punta del Este na cabeceira da comarca de Bergantiños, a vila de Carballo.
O abundante cocido, o magnífico viño, traído directamente da Ribeira Sacra, e as fontes e fontes de orellas que pecharon o banquete animaron a velada dende o primeiro momento. Aínda non chegaran as filloas cando Antonio Mato Rial (fundador do cuarteto Os Matos de A Coruña) obsequiounos cunha exótica interpretación á harmónica de varias foliadas galegas, os aplausos non se fixeron esperar.
Servido o café e, se cadra, cohibidos ante á cantidade de senlleiros mestres gaiteiros esparexidos polas mesas, a xente retrasou o comezo da foliada.
Un momento máxico da xornada veu da man do gran mestre gaiteiro Manuel Viqueira Vieites, o Gaiteiro de Vilaverde (Ordes, A Coruña), quen amosou o seu carisma coa interpretación dunha das xoias do seu repertorio, unha muiñeira cargada de forza e sentimento que provocou, primeiro, un silencio de espectación seguido dun rebumbio de auténtica ledicia, onde, por suposto, non faltaron os aturuxos.
Pouco a pouco os asistentes fóronse animando a tocar e bailar co cal a festa continuou ata a noitiña.
A Asociación de Escritores en Lingua Galega celebra a 3ª edición deste acto de homenaxe e recoñecemento anual. Cada ano escóllese a unha figura ou colectivo que, pola súa actividade de intervención social, contribuíse á difusión pública da cultura galega.
Este ano preténdese poñer de relevo á traxectoria do colectivo Ponte... nas Ondas! que naceu en 1995 coa fin de incentivar a comunicación internacional entre adolescentes e profesionais das dúas beiras do Miño. Conseguiron salvar barreiras e crear lazos de entendemento entre comunidades veciñas pero separadas por unha fronteira política. O labor de recuperación, estudo e clasificación do Patrimonio Inmaterial Galego-Portugués de Ponte... nas Ondas!! a través da radio tamén constitúe unha labor encomiable deste colectivo.
Os actos da 3ª edición de “Os bos e xenerosos” terán lugar o sábado 25 de marzo a partir das 11:30 no Auditorio do Centro Sociocultural Caixa Galicia, na rúa Policarpo Sanz, 21, Vigo.
De novo no comezo da primavera, coma noutras e facéndoo xa ritual, nesta ocasión a Asociación de Gaiteiros Galegos quéreo celebrar cun suculento xantar ao estilo do país, formalizando o 'XI Xantar Gaiteiro', para o vindeiro domingo 26 de marzo no restaurante Punta del Este de Carballo (A Coruña).
O menú (22 euros) será:
Sopa de cocido
Cocido de grelos e patacas con polo, cachola, lacón, carne fresca, chourizos...
Pan de molete e viño Mencía ...(¡auga tamén...!)
Filloas... orellas...café araghonés (con Jotas)
Desta volta, amais, imos propoñer máis actividades coma música na rúa; exposición de instrumentos e fotos; representación teatral e proxeccións.
Traede bo humor e algún instrumento musical. E para os que non lle paran quietos os pes, que non se couten, tamén poderán botar unha baila. Pero traede tamén a algún colega que queira participar connosco porque andamos a procura de xente con ilusión que queira aportar algo á nosa comunidade de músicos e de xente namorada da cultura do pobo galego.
Para confirmar a participación, por favor, ponte en contacto con nos antes do día 22 de marzo:
sonsoles@gaiteirosgalegos.com // raulgalego@yahoo.es
(Sonsoles) 986 847 074 // (Raúl Galego) 607 844 813
Mais información.
