Prezados usuarios,
Debido a un problema informático cómpre introducir de novo aos usuarios rexistrados. Prégase que enviedes un correo a socios@gaiteirosgalegos.com suxerindo un novo contrasinal.
Pedindo desculpas polas molestias que poida ocasionar.
Cordiais saúdos
A A.C. Tangaraño presenta unha nova edición do seu espectáculo que se celebrará o vindeiro luns, primeiro de maio, no Teatro Cine Salesianos ás 20 horas, sendo a entrada de balde.
Ao longo de case dúas horas, os compoñentes das diferentes agrupacións da A.C. Tangaraño, percorrerán a xeografía galega a través da música e do baile tradicional, amosando pezas recollidas en diferentes vilas e aldeas. Asemade, como ven sendo habitual nas súas actuacións, farán referencia á historia más recente ó incorporar ó seu espectáculo bailes que no seu día foran interpretados por “Coros y Danzas”, así como outras pezas do chamado “baile coreográfico”.
O vindeiro domingo 30 de Abril terá lugar en Melide a segunda edición desta foliada que organiza a Agrupación Folclórica “Castelo” coa colaboración do Concello de Melide e a Asociación Catasol.
As actividades comezarán ás 11 da mañá cun pasarrúas ao cargo do Grupo de Gaitas “Castelo” de Melide e ás 11:30 terá lugar a apertura da “Mostra de Artesanía” e das exposicións sobre “Os Garceiras” e“Os Xogos Populares Galegos”, entre outras.
Ao medio día comezará a actuación do grupo de baile “Azougue” E.M.F de Betanzos e os que así o queiran poderán participar no obradoiro sobre “A malla” e contemplar a exhibición dunha máquina de mallar do S. XIX.
Ás 14:30 haberá un Xantar popular e a sobremesa estará amenizada por Mini e Mero: “Romances de cego”.
Ás 17:30 os máis cativos poderán tomar parte nun obradoiro infantil sobre Os Maios e ás 18:00 Jesús Miranda falará sobre a “Afinación da gaita e tratamento das palletas”. Ás 19:30 de novo as gaitas soarán polas rúas da vila para rematar a xornada cun serán que dará comezo ás 22:00 pero que non se sabe cando rematará.
Para todos aqueles que aínda non teñades plan para a ponte do 1 de maio a asociación ‘Xuntanza de Galegos’ de Alcobendas invítavos a participar nunha concentración de músicos tradicionais en contra das falsificacións da tradición musical galega e a favor dunha interpretación responsable da mesma.
A devandita concentración terá lugar a fin de semana do 29 e 30 de abril na vila madrileña. Os actos comezarán o día 29 de abril cun pasacorredoiras polas rúas de Alcobendas, para rematar cunha xuntanza no feiral, onde cada grupo realizará unha actuación de entre 15 e 20 minutos. Os recorridos e a festa non cesarán ata luns día 1 que é festivo.
Mais información.
O vindeiro domingo 23 de abril terá lugar a Asemblea Xeral Ordinaria do 2006. Este ano terá lugar a partir das 9:30 na Sala Mozart do AUDITORIO DE GALIZA, sito na Avenida do Burgo das Nacións s/n, na cidade de Santiago de Compostela.
A asemblea terá a seguinte orde do día:
1. Lectura e aprobación se proceder das actas anteriores (24 de abril de 2005).
2. Informe das actividades realizadas.
3. Aprobación do estado de contas do ano 2005.
4. Rogos e preguntas.
Baixo o título "O estado de saúde da música en Galiza" terá lugar unha mesa redonda o vindeiro Luns 24 ás 20:00 horas no Salón de Actos do Hotel NH Palacio de Vigo, sito na rúa García Barbón 17-19, organizada pola Comisión Comarcal de Cultura do BNG en Vigo.
Cal é o estado de saúde da música en Galiza? Eis a pregunta á que tentarán dar resposta os seguintes convidados:
Luís Bará, Director Xeral de Creación e Difusión Cultural da Consellería de Cultura e Deporte da Xunta de Galiza.
Xurxo Souto, músico e xornalista. Director de programación na Radio Galega.
Oscar Domínguez, Directivo de DISCMEDI.
Ugia Pedreira, música e directora do Conservatorio de Lalín.
Presentará e moderará a Mesa Redonda:
Xosé Paz Antón, deputado polo BNG e membro do grupo NA LÚA.
Como podes ver, administración, medios de comunicación, industria musical e músicos teñen a palabra. Para completar e dar sentido a este acto, falta só a túa presenza.
Edicións do Cumio é indiscutibelmente a discográfica que desde hai máis de dez anos ven apostando con máis forza por publicar e distribuír traballos discográficos e bibliográficos de músic@s tradicionais galeg@s. Proba delo é o amplo e variado catálogo co que contan a día de hoxe. Fiel á súa liña e compromiso coa música tradicional galega, publica este mes de abril o novo traballo discográfico de Iván Costa
Desexado e agardado:
Iván Costa, o gaiteiro de Moaña, presenta estes días o seu disco “Ávrego”, escoita un pequeno adianto do que será este traballo e coñece as impresións que o autor fai sobre cuestións varias relacionadas coa música tradicional.
Aínda que novo, Iván Costa é unha persoa cunha longa e ampla traxectoria na música tradicional galega.
A Iván coñéceselle, e recoñéceselle, sobre todo por ser un gaiteiro de cuxo traballo están sempre moi pendentes as novas xeracións de gaiteiros e gaiteiras galegas.
Con este novo disco o que queda patente é que Iván Costa é un músico tradicional: gaitas, zanfonas, tambores, bombos, pandeiros, pandeiretas, tarrañolas…un músico tradicional inquieto, innovador e cun profundo respeto hacia a música tradicional galega.
De todo isto da boa mostra “Ávrego”.
Mais información.
Durante o próximo mes de maio, a cultura vai circular por toda Galiza baixo a lona de dúas carpas itinerantes, que van acoller moi diversas iniciativas socio-culturais e outras propostas musicais, escénicas, audiovisuais e educativas. Ademais da presenza de artistas profesionais, trátase de crear espazos de participación abertos á sociedade. É por iso que desde a Dirección Xeral de Creación e Difusión Cultural e desde a Dirección Xeral de Xuventude, animan a compartir as vosas creacións (vídeos, músicas, fotografías), embarcando neste proxecto tentacular.
Podedes participar se tedes entre 12 e 20 anos .
O prazo para enviar os vosos traballos remata o 20 de abril
Toda a información en http://www.aculturacircula.info/
Bases da convocatoria en http://www.aculturacircula.info/media/bases_do_concurso_embarca_na_carpa.pdf
O concello de Vigo ven de nomear ao gaiteiro Juan Manuel González Alonso vigués distinguido neste ano 2006.
Juan Alonso foi un dos fundadores do mítico grupo "Airiños do Parque de Castrelos". Con anterioridade Nazario González "Moxenas" xa fora galardoado con este premio no ano 1991 e Antón Corral no ano 2001.
O gaiteiro de Fene Daniel Bellón ven de impartir un curso de gaita dentro da segunda edición da feira gastronómica "Galicia en Móstoles", con grande éxito de crítica e público.
O curso tivo lugar os días 1 e 2 de abril e estivo organizado polo Centro Gallego de Móstoles.
No museo Liste de Vigo (sito na rúa Pastora 22) vense de inaugurar unha exposición absolutamente imprescindíbel para calquera persoa cun mínimo de interse pola música galega.
Estará aberta até o 20 de maio de 2006, con entrada libre, de martes a sábado de 11 a 14 e de 17 a 19 horas
O título "Sons doutro tempo, hoxe. O prodixio de Antón Corral", é altamente clarificador e só desexar que gostedes dela.
AS FALSAS APARIENCIAS CONTRA O LEGADO TRADICIONAL
Parece ser que uns 3000 “vistosos” gaiteiros desfilarán polas rúas de Ponferrada. E por aquilo da gaita e do que din alguén pensará que isto é unha manifestación poderosa de música tradicional. Preguntámonos, dende cando foi tradicional no Bierzo, en Galicia ou Asturias unha gaita de tres roncos sobre o ombro, un tambor premier metálico de parches de plástico, un bombo tocado con dúas mazas ou un traxe de home con faldas ao máis puro estilo escocés. Así é como se presentará con este aire militar que a caracteriza a Real Banda de Gaitas da Deputación de Ourense organizadora da Liga galega de Bandas de Gaitas que se vai realizar na cidade do Bierzo o próximo día 9.
Mais información.
A Asociación Cultural Cántigas e Frores ven organizando, dende 1983, con carácter anual, un “Curso de Cultura Tradicional Galega”, con varias especialidades, e con inscirción aberta e gratuíta. Este curso foi o primeiro que se fixo con carácter permanente en España e vense celebrado ininterrumpidamente tódolos anos en Semana Santa. Acadará no ano 2006 a súa XXIV edición.
A este curso asisten coma alumnos músicos e bailarines de todo o Estado e, en ocasións, de outros países.
Mais información.
O pasado domingo 2 de abril tivo lugar en Arteixo o VII Concurso de Música Tradicional organizado pola A.C. Xiradela. Os grupos premiados foron os seguintes:
Cuartetos de Gaita:
1º PREMIO: "Os Fontes Suairas" (A Coruña)
2º PREMIO: "Donaire" da A. C. Donaire (A Coruña)
3º PREMIO: S.C.R.D. "O Castro" (Miño)
Gaiteiros solistas
1º PREMIO: Anáisy Gómez Fernández
2º PREMIO: Anxo Piñeiro Souto
3º PREMIO: Eric Torra Naveira
Mais información.
O Ateneo Ferrolán ven de enviar as basees e a
peza obrigatoria que podes descargar en formato encore desde esta ligazón,
do concurso de gaita solista "Constatino Bellón" correspondente ao ano 2006.
O “CONSTANTINO BELLÓN”, é unha plataforma, creada polo Ateneo Ferrolán, para servir de canle de expresión e presentación de novas pezas de autores e axudar a manter e potencia-la música tradicional de gaita galega.
O “CONSTANTINO BELLÓN” é un concurso de composición e interpretación de gaita que pretende mante-lo xeito de toca-la gaita galega con técnica e xiros propiamente galegos.
O “CONSTANTINO BELLÓN” pretende recolle-la mais pura tradición gaiteiril e manter, ó longo dos anos, un lugar de encontro e intercambio para tódolos gaiteiros galegos.
Mais información.
